საქართველოს ძალოსნობის ეროვნული ფედერაციის პრეზიდენტმა კახი კახიაშვილმა დაკავებული თანამდებობა დატოვა. მან ეს მოულოდნელი განცხადება ქართველი ძალოსნების ოლიმპიური ტრიუმფის შემდეგ მიიღო. შეგახსენებთ, რომ რიოში ლაშა ტალახაძე ჩემპიონი გახდა, ირაკლი თურმანიძემ კი ბრინჯაოს მედალი მოიპოვა.

როგორც კახიაშვილმა საქართველოს ძალოსნობის ეროვნული ფედერაციის პრეს-ცენტრს განუცხადა, ორგანიზაციის ახალი საპრეზიდენტო არჩევნები 2016 წლის 19 სექტემბერს გაიმართება და სავარაუდოდ, ის კენჭს თავადაც იყრის.

კახი კახიაშვილი: „ძალოსნობისთვის წარმატებული ოლიმპიადის მიუხედავად, მე გადავდექი ძალოსნობის ეროვნული ფედერაციის პრეზიდენტის თანამდებობიდან და გაცნობებთ, რომ საპრეზიდენტო არჩევნები 2016 წლის 19 სექტემბერს გაიმართება. როგორც არ უნდა დასრულდეს შემდეგი არჩევნები, მე ყოველთვის ქართული ძალოსნობის გვერდში ვიქნები.

სავარაუდოდ, მეც ვიყრი კენჭს და თუ ძალოსნობის საზოგადოება, ძალოსნობის ოჯახის წევრები მხარს დამიჭერენ, კიდევ უფრო მეტი მონდომებით, ენთუზიაზმით გავაგრძელებ მუშაობას. რა თქმა უნდა, შიდა შეჯიბრებები გვაქვს დასაგეგმი, ჩასატარებელია უამრავი შეკრება, საერთაშორისო არენაზე ჩვენი პრესტიჟის დაცვაა აუცილებელი. ეს ყველაფერი დასახვეწია“.