ევროპის ლიგაზე, რა თქმა უნდა, უმთავრესად თბილისის "დინამოს" ამბები გვაინტერესებს, მაგრამ მესამე საკვალიფიკაციო ეტაპის საპასუხო შეხვედრები გაიმართა და ქართველ ლეგიონერებზე დავწერთ.
ნიკა კვეკვესკირის "გაბალა" შარშანდელივით ექსპრესივით მიდის საკვალიფიკაციო ეტაპზე. "სამტრედიას" შემდეგ, აზერბაიჯანულმა კლუბმა უნგრეთის მტკ გამოთიშა და აი, ფრანგული "ლილიც" ჩამოიშორა. სტუმრად 1:1-ის შემდეგ, "გაბალამ" შინ 1:0 მოიგო. კვეკვესკირმა შეუცვლელად ითამაშა და სასიამოვნოა, რომ ეს ფეხბურთელი წლიდან წლამდე პროგრესირებს - "გაბალაშიც" ერთ-ერთი საუკეთესო გახლავთ, ისევე როგორც "ინტერში" იყო.
"ლილში" ყველაზე აქტიური იყო ევროპის ჩემპიონატის ფინალის გმირი, პორტუგალიელი ედერი.
შოთა არველაძის გაწვრთნილმა თელ-ავავის "მაკაბიმ" რუმინულ "პანდურისთან" საშინაო შეხვედრაც მოიგო - 2:1. შეგახსენებთ, პირველ მატჩში თელავიველებმა 3:1 იმარჯვეს. შოთას გუნდმა ზედიზედ მესამე ეტაპი გაიარა.
ჩეხეთის "სლავიამ" მოახერხა ფლეი-ოფში გასვლა: ლევან ყენიას გუნდმა შინ 0:0-ის შემდეგ, სტუმრად 1:1 ითამაშა პორტუგალიის "რიუ ავესთან". ყენია სათადარიგო იყო, მოედანზე არ შეუყვანიათ.
გიორგი ქვილითაიამ გუშინ ოფიციალურად გააფორმა კონტრაქტი ვენის "რაპიდთან" და ამდენად, ვენელთა ამბებიც საინტერესოა. "რაპიდმა" სტუმრად 0:0-ის შემდეგ, შინ 3:0 სძლია ბელარუსის "ჟოდინოს". 3:0 კიდევ შვება იყო ბელარუსთათვის, ავსტრიელებს გაცილებით დიდი ანგარიშით მოგება შეეძლოთ.
ქვილითაია ფლეი-ოფში ვერ ითამაშებს, რადგან ჩემპიონთა ლიგის საკვალიფიკაციო ეტაპზე გამოდიოდა თბილისის "დინამოში". აი, ჯგუფში თუ გავა "რაპიდი", მერე შეეძლება გიორგის თამაში.
თემურ ქეცბაიას გაწვრთნილი აეკ-ი გავარდა: სტუმრად ნულოვანი ფრის შემდეგ, შინ 0:1 წააგო ფრანგულ "სენტ ეტიენთან".
უკრაინული "ვორსკლა" ზაგრების "ლოკომოტივთან" შინ 2:3 დამარცხდა და ევროპის ლიგას გამოეთიშა. სანდრო კობახიძის აქტიურობას მეტოქის ავტოგოლი მოჰყვა და ქართველმა მთლიანობაში აქტიურადაც ითამაშა, მაგრამ "ვორსკლა" დამარცხდა.
მოულოდნელი იყო მოსკოვის "სპარტაკის" გავარდნა ლარნაკას აეკ-თან. სტუმრად 1:1-ის შემდეგ (სადაც ჯანო ანანიძემ მშვენიერი გოლი გაიტანა), შინ ბოლო წუთებზე გაუშვა და 0:1 დამარცხდა. ჯანო სასტარტოში იყო და შესვენებისას შეცვალეს. იძულებითი ცვლილება იყო.
"სპარტაკის" მწვრთნელი დმიტრი ალენიჩევი: "დღეს ჯანოს დაყენება სარისკო იყო. მცირე ტრავმა ჰქონდა. ველაპარაკე, მან კი მითხრა, ვცდიო. თუმცა, ტრავმამ იჩინა თავი".
სავარაუდოდ, ჯანო რამდენიმე დღე დაისვენებს.
