ბრაზილიელი თავდამსხმელი ალეშანდრე პატო ევროპას დაუბრუნდა. ამის შესახებ მისი აწ უკვე ყოფილი კლუბის, “კორინთიანსის” ვებგვერდი ოფიციალურად იუწყება. 26 წლის სამხრეთამერიკელი შემტევი ამიერიდან ესპანური “ვილიარეალის” ღირსებას დაიცავს. აღნიშნული ტრანსფერი ესპანელებს ჯერ არ დაუდასტურებიათ და ამიტომაც, უცნობია კონტრაქტის ზუსტი დეტალები და ხელშეკრულების ხანგრძლივობა.

“ვილიარეალთან” შეთანხმება მიღწეულია ალეშანდრე პატოს კონტრაქტის სრულად გამოსყიდვის თაობაზე”, - წერს ბრაზილიური გრანდის საიტი.

პატო მიუხედავად ჯერაც საკმაოდ პატარა ასაკისა, პირველად ძველ კონტინენტზე 2008 წლის ზამთარში გამოჩნდა, როცა იტალიურ “მილანში” ჩაირიცხა და იქ 2013 წლამდე დარჩა, მაგრამ მერე სამშობლოში დაბრუნდა, სადაც “კორინთიანსისა” და “სან პაულუს” რიგებში გაისარჯა. გასული სეზონის მეორე ნახევარი კი, იჯარით ლონდონის “ჩელსიში” დაჰყო, მაგრამ ნისლიან ალბიონზე თავი ვერ დაიმკვიდრა.