როგორც უკვე ვიუწყებოდით, ნიკოლოზ ბასილაშვილი პირველი ქართველი ჩოგბურთელი გახდა, რომელმაც პროფესიონალ ჩოგბურთელთა ასოციაციის (ATP) მიერ ორგანიზებული ტურნირის ფინალში გასვლა მოახერხა.

24 წლის ბასილაშვილმა ამ წარმატებას ავსტრიულ კიცბიუელში მიმდინარე Generali Open-ზე (საპრიზო ფონდი 520 070 ევრო), სადაც 4 მეტოქის დამარცხება მოახერხა. ნიკოლოზმა ყველაზე დამაჯერებლად ნახევარფინალში ითამაშა, როდესაც 26 წლის სერბი დუშან ლაიოვიჩის დასაჯაბნად მხოლოდ 64 წუთი დასჭირდა – 6:3, 6:1.

“ძალიან ბედნიერი და ამაყი ვარ. ამისთვის დიდი სამუშაო გავწიე. მოსაგებად 100% გავიღე. ძალიან მნიშვნელოვანი მატჩი იყო. ცოტა ვინერვიულე, თუმცა, ვფიქრობ, კარგად ვითამაშე”, - განაცხადა ბასილაშვილმა მატჩისშემდგომ პრეს-კონფერენციაზე.

ქართველმა ჩოგბურთელმა, რომელმაც წლეულს ჩინეთში გუანჟოუს (ფინალში ლაცკოს სძლია) და გერმანიაში ჰეილბრონის (შტრუფს აჯობა) ჩელენჯერებზე იმარჯვა, პირველ მოწოდებაზე ბურთების 73% (30 41-დან) მოიგო და ლაიოვიჩს მოწოდება 4-ჯერ აართვა, მეტოქემ კი 1 ბრეიკიც ვერ განახორციელა.

ფინალში ბასილაშვილის მეტოქე იტალიელი პაოლო ლორენცი იქნება, რომელმაც ავსტრიელ ჯერალდ მელცერს ურთულეს შეხვედრაში 7:6 (7:4), 7:6 (15:13) სძლია. მარტო ის რად ღირს, რომ აპენინელმა თამაშის მოგება მე-13 (!) მატჩ-პოინტზე მოახერხა.

“მატჩ-პოინტების რაოდენობა ნამდვილად არ დამითვლია, თუმცა, ბევრი შანსი რომ გავანიავე, ფაქტია. უბედნიერესი ვარ. ბოლოს ფინალში 2 წლის წინ ვითამაშე და ახლა, გამარჯვების კიდევ ერთი შანსი მეძლევა. ფინალში ისევე უნდა ვითამაშო, როგორც – დღეს. უფრო სწორად, ცოტა უკეთაც კი”, - აღნიშნა ლორენციმ, რომელმაც 2014 წლის მარტში სან პაულოს ტურნირის ფინალში გააღწია, იქ კი არგენტინელ დელბონისთან დამარცხდა.

კიცბიუელის ტურნირის ფინალური მატჩი დღეს, 23 ივლისს, თბილისის დროით 15:00 საათზე გახლავთ დაგეგმილი. შეგახსენებთ, რომ Generali Open-ის გამარჯვებული 250 სარეიტინგო ქულას და 82 450 ევროს მიიღებს.