ფეხბურთი – საფეხბურთო ჩემპიონატები – გერმანია – ბუნდესლიგა – ინტერვიუ

არიენ რობენი, რომელსაც გასული სეზონის მეორე ნახევარი ტრავმის გამო გაუცდა, ახალი სეზონის მოსამზადებელ პირველივე ამხანაგურ მატჩში დაშავდა. ამჟამინდელი ინფორმაციით, ჰოლანდიელ ვარსკვლავს 6 კვირა გაუცდება.

ინტერნეტორტალმა Goal.com-მა კი, შემთხვევით ისარგებლა და მასთან ინტერვიუ ჩაწერა, რომელშიც საკმაოდ საინტერესო თემებზე ესაუბრა.

ევროპის 2016 წლის ჩემპიონატზე – შვებულებაში ამერიკის შეერთებულ შტატებში ვიყავი და არცერთ შეხვედრაზე მიყურებია – რთულია, იმის ნახვა, სადაც შენ კვალიფიცირება ვერ შეძელი. ჰოლანდიის ნაკრებიდან წასვლაზე არასდროს მიფიქრია. ამის გაკეთებას ჯერ არც ვაპირებ, მე ვამაყობ ეროვნული გუნდის მაისურის ტარებას.

ინგლისის პრემიერლიგა დამდეგ სეზონში, მოურინიო და გვარდიოლა – ორი დიდი მწვრთნელი, ორი დიდი პროფესიონალი. ძალიან საინტერესო ჩემპიონატი უნდა გამოვიდეს. ამ ორს შორის რომელი მირჩევნია? – არ ვიცი, რა გითხრათ. ორივესთან მიმუშავია, ორივემ ბევრი რამ მასწავლა და განსხვავებული რამ შემოიტანეს ჩემს კარიერაში.

დასუსტებული “დორტმუნდი” – მას ძალიან კარგი მწვრთნელი ჰყავს. შარშან “ვერცხლის სინის” მოსაგებად ბოლომდე იბრძოდნენ და დარწმუნებული ვარ, ასე იქნება მომდევნო სეზონშიც.

კონტრაქტი, რომელიც გაისად იწურება – ამაზე ახლა არ ვფიქრობ. მინდა მხოლოდ ვარჯიში და თამაში – ეს ერთადერთია რაც ახლა მართლა მაფიქრებს. აქ სიამოვნებით დავრჩები კიდევ, მნიშვნელობა არ აქვს ეს ერთი წლით იქნება, ორით თუ სამით... თუ “ბაიერნი” ახალ კონტრაქტს შემომთავაზებს, დავრჩები – რატომაც არა?!

“ბეშიქთაშის” ინტერესის შესახებ – არაფერი მსმენია – შესაძლოა, ჩემს აგენტს ესაუბრნენ, მამაჩემს. არ ვიცი. ერთადერთი რაზეც მართლა ვფიქრობ, “ბაიერნია”.