ბელგიის ეროვნული ნაკრების მთავარი მწვრთნელის თანამდებობა, შესაძლოა, ჰოლანდიელმა სპეციალისტმა ლუის ვან გაალმა დაიკავოს. ამის შესახებ Daily Mail-ი ბელგიის საფეხბურთო ასოციაციის პრეზიდენტის ფრანსუა დე კერსმეკერის სიტყვებზე დაყრდნობით იტყობინება.
“ვან გაალი შეიძლება ერთ-ერთი კანდიდატი იყოს. ჩვენ მის კანდიდატურას აუცილებლად განვიხილავთ, თუკი თავადაც დაინტერესდება ამ სამსახურით” - ამბობს ბელგიური ფეხბურთის მმართველი.
ბელგიის ეროვნული ნაკრები ამჟამად უმწვრთნელოდაა - საფეხბურთო ასოციაციამ ახლახან დასრულებულ ევროპის ჩემპიონატზე მეოთხედფინალიდან გუნდის გამოთიშვა უარყოფით შედეგად შეაფასა და მარკ ვილმოტსი დაითხოვა. “მანჩესტერ იუნაიტედიდან” გათავისუფლების შემდეგ უმუშევარია ლუის ვან გაალიც.
