ვთბ-ლიგის მომავალი სეზონში კლუბების რაოდენობა 16-დან 14 გუნდამდე შემცირდება, მონაწილეთა შორის კი საქართველოს წარმომადგენელი თბილისის “ვითა” აღარ იქნება. ამ ინფორმაციას რუსული გაზეთი “იზვესტია” ავრცელებს.

არსებული ცნობით, ტურნირს “ვითას” გარდა, ჩეხური “ნიმბურკი” და ფინური “ბაიზონსიც” გამოაკლდებიან. ქართული და ფინური კლუბები ფინანსურ პრობლემებს უჩივიან და რუსეთში ხშირი გადაფრენა-გადმოფრენით დაინტერესებულნი არ არიან.

ჩეხების უარის მიზეზი კი მოთამაშეთა გადატვირთულობაა. “ნიმბურკი” ჩეხეთის ჩემპიონატის გარდა, ფიბა-ს ჩემპიონთა ლიგაში თამაშსაც გეგმავს და სხვა ტურნირებისთვის დრო აღარ რჩება.

ვთბ-ლიგის ხელმძღვანელობა აღნიშნული 3 კლუბის მხოლოდ ერთით ჩანაცვლებას აპირებს და არჩევანს ერთ-ერთ რუსულ გუნდზე შეაჩერებს. ესენი “სახალინი”, “პარმა” და “სამარა” არიან.