ქართველმა მოჭადრაკე ლელა ჯავახიშვილმა (2487) ჩინეთის ქალაქ ჩენგდუში მიმდინარე ფიდე-ს გრან-პრიზე პირველი გამარჯვება იზეიმა.

მე-9 ტურში ჯავახიშვილმა თეთრი ფიგურებით რუსი ოლგა გირიას (2444) სძლია და 4.0 ქულით 12 მონაწილეს შორის მე-8 ადგილზე გადაინაცვლა.

თანამემამულეს 0.5 ქულით უსწრებს ბელა ხოტენაშვილი (2454), რომელიც შავებით ერთპიროვნულ ლიდერ დრონავალი ჰარიკას (2526) დაუზავდა.

შედეგად, ინდოელმა მოჭადრაკემ 6.0 ქულით პირველი ადგილი შეინარჩუნა, ქართველი კი 4.5 ქულით მე-6 პოზიციაზე იმყოფება.

ჰარიკას 0.5 ქულით ბულგარელი ანტუანეტა სტეფანოვა (2512) ჩამორჩება, ინდოელ ჰამპი კონერუს (2575), ჩინელ ვენჯუნ ჟუს (2578) და უკრაინელ მარია მუზიჩუკს (2545) კი აქტივში 5.0-5.0 ქულა აქვთ.

გრან-პრის დასრულებამდე 2 ტურია დარჩენილი. მე-10 ტურის პარტიები 13 ივლისს შედგება და ხოტენაშვილი თეთრებით შვედ პია კრამლინგს (2463) ეთამაშება, ჯავახიშვილი კი შავებით – ჩინელ ჟონგი ტანს (2495).