ჩინურ ჩენგდუში მიმდინარე ქალთა საჭადრაკო გრან-პრის მორიგი ეტაპი ინდოელთა უპირატესობით მიმდინარეობს. 7 ტურის თავზე ერთპიროვნული ლიდერი დრონავალი ჰარიკაა (2526), რომლის აქტივშიც 5.0 ქულაა.

თანამემამულეს 0.5 ქულით ჩამორჩება და დამატებითი მაჩვენებლებით მე-2 პოზიციაზეა ჰამპი კონერუ (2575). იდენტური მონაგარით, შემდეგ სატურნირო ცხრილში ჩინელი ვენჯუნ ჟუ (2578) და ბულგარელი ანტუანეტა სტეფანოვა (2512) მოდიან.

შეგახსენებთ, რომ ჩენგდუში 2 ქართველი მოჭადრაკეც თამაშობს. ბელა ხოტენაშვილი (2454) 3.5 ქულით მე-6 ადგილზეა, ხოლო ლელა ჯავახიშვილს (2487) 2.5 ქულით მე-9 საფეხური უკავია. გასულ ხოტენაშვილი და ჯავახიშვილი ერთმანეთს დაუპირისპირდნენ და ყაიმი გააფორმეს.

გრან-პრი თერთმეტ ტურად მიმდინარეობს, მორიგი მე-8 ტურის პარტიები კი დღეს შედგება. ხოტენაშვილი თეთრი ფიგურებით ჟუს ეთამაშება, ხოლო ჯავახიშვილი შავებით კიდევ ერთ ჩინელ ქსუე ჟაოს (2510) დაუპირისპირდება.