ჩინურ ჩენგდუში მიმდინარე ქალთა საჭადრაკო გრან-პრის 5 ტურის თავზე ლიდერობა შეინარჩუნა ჰამპი კონერუმ (2575). ინდოელმა მოჭადრაკემ შავი ფიგურებით ყაიმი ლელა ჯავახიშვილთან (2487) გააფორმა და თავი 4.0 ქულას მოუყარა.

ჯავახიშვილს, რომელსაც ჯერ პარტია არ მოუგია (4 ყაიმი, 1 მარცხი) 2.0 ქულა მოუგროვდა და ტურნირის 12 მონაწილეს შორის მე-8 ადგილზეა. მე-6 ტურში, რომელიც 8 ივლისს შედგება, ჯავახიშვილი შავებით ბულგარელ ანტუანეტა სტეფანოვას (2512) ეთამაშება, რომელიც 3.0 ქულით მე-4 პოზიციზეა.

სამწუხაროდ, პირველი მარცხი შეემთხვა ბელა ხოტენაშვილს (2454). მან შავი ფიგურებით რუს ოლგა გირიასთან (2444) წააგო, 2.5 ქულა შერჩა და მე-6 ადგილამდე დაქვეითდა. მომდევნო ტურში ხოტენაშვილი თეთრებით ჩინელ ჟონგი ტანს (2495) გაეჯიბრება, რომელიც 0.5 ქულით აუტსაიდერებში იმყოფება.

მე-6 ტურში ცენტრალური კონერუს და ჩინელი ვენჯუნ ჟუს (2578) პარტია იქნება. ეს უკანასკნელი ლიდერს 0.5 ქულით ჩამორჩება.