ჩინეთის ქალაქ ჩენგდუში გრძელდება ქალთა 2015-16 წწ. მსოფლიო საჭადრაკო გრან პრის რიგით IV ეტაპი, რომელშიც 2 ქართველი მოჭადრაკე თამაშობს: ლელა ჯავახიშვილი და ბელა ხოტენაშვილი.

შეგახსენებთ, რომ ტურნირი 12 მონაწილეს შორის წრიული სისტემით 11 ტურად ტარდება და საკმაოდ წარმომადგენლობითია. მონაწილეთა შორის არიან: მსოფლიოს ექსჩემპიონები – ანტუანეტა სტეფანოვა (ბულგარეთი, 2512) და მარია მუზიჩუკი (უკრაინა, 2545), ევროპის ექსჩემპიონი პია კრამლინგი (შვედეთი, 2463), მსოფლიო საჭადრაკო ოლიმპიადების გამარჯვებულები: ჟუ ვენჟუნი (ჩინეთი, 2578), ქსუე ჟაო (ჩინეთი, 2510) და ოლგა გირია (რუსეთი, 2444) და მსოფლიოს საჭადრაკო რეიტინგ-სიის ერთ-ერთი ლიდერი ჰამპი კონერუ (ინდოეთი, 2575). ტურნირის საპრიზო ფონდი 60 ათასი ევროა, საიდანაც ჩემპიონს 10 ათასი ერგება.

3 ტურის თავზე 2.5 ქულით ინდოელები დრონავალი ჰარიკა (2526) და კონერუ ლიდერობენ, რომელთაც 2-2 ქულით კვალში ხოტენაშვილი და სტეფანოვა უდგანან. ბელამ კონერუსთან და სტეფანოვასთან ყაიმები გააფორმა, ერთადერთი გამარჯვება კი დღეს მარია მუზიჩუკთან იზეიმა.

ნაკლები წარმატებით ასპარეზობს ჯავახიშვილი, რომელსაც 1.0 ქულით ბოლოსწინა მე-11 ადგილი უკავია. ლელამ ჟუსთან და კრამლინგთან პარტიები ყაიმით დაასრულა, ჰარიკასთან კი შავი ფიგურებით დამარცხდა.

მე-4 ტურში, რომელიც 5 ივლისს შედგება, ხოტენაშვილი თეთრებით 0.5 ქულით უკანასკნელ პოზიციაზე მყოფ ჟაოს ეთამაშება, ხოლო ჯავახიშვილი შავებით ანა მუზიჩუკს (2545) გაეჯიბრება. უკრაინელი 1.5 ქულით მე-7 ადგილზეა.

შეგახსენებთ, რომ ზუსტად ჩენგდუ აღმოჩნდა იღბლიანი ჩვენი ქალთა ნაკრებისთვის შარშან, როდესაც მათ მსოფლიოს გუნდურ პირველობაზე ისტორიული გამარჯვება მოიპოვეს. იმედია, რომ ჩვენი წარგზავნილები ამ ტურნირშიც გაგვახარებენ თავიანთი წარმატებით.