მოსკოვის "სპარტაკის" მწვრთნელმა დიმიტრი ალენიჩევმა საქართველოს ეროვნული ნაკრების ნახევარმცველ ჯანო ანანიძეს მომავალ სეზონში მიზნად პროდუქტიული თამაში მოსთხოვა. თავად ფეხბურთელმა კლუბის ოფიციალურ ვებგვერდთან საუბრისას აღნიშნა, რომ იგი არ მომკვდარა, არც არაფერი ტკივა და მზადაა გუნდს წარმატების მოპოვებაში დაეხმაროს.

"ვფიქრობ, მომავალი სეზონი ჩემთვის გადამწყვეტი იქნება. დიდი ხანი არ მითამაშია, ყველაფერი კარგად მიდის და მინდა მქონდეს ის პერიოდი, როდესაც მატჩზე ბოლომდე კონცენტრირება შემეძლება. ამის შემდეგ კი ჩემთვის მნიშვნელოვანია მწვრთნელის ბოლომდე ნდობა, როგორც ეს "როსტოვში" თამაშისას მოხდა. მაშინ 5 გოლი გავიტანე 10 თუ 11 საგოლე გადაცემა შევასრულე.

ახლა კი მინდა გუნდს წარმატების მიღწევაში დავეხმარო. ვიმედოვნებ ტრავმების პერიოდი დასრულდა და მომდევნო 10 წელიწადში არაფერი პრობლემა მექნება. ალენიჩევმა მითხრა, რომ 10 გოლი უნდა გავიტანო და ამდენივე საგოლე გადაცემა შევასრულო. ჩემი აზრით, იგი არ ხუმრობს, ასე რომ, ვცდი." - განუცხადა ანანიძემ "სპარტაკის" ოფიციალურ ვებგვერდს.

ჯანო ანანიძეს გასული სეზონი ფაქტობრივად გაუცდა. ახალგაზრდა მოთამაშე ბოლო წლების განმავლობაში უმეტესად კლუბის ლაზარეთში იმყოფება ხოლმე. ბოლო ორ სეზონში ქართველმა ნახევარმცველმა მხოლოდ 28 მატჩი ჩაატარა და სამი საგოლე გადაცემა შეასრულა.