ქართველმა ჩოგბურთელმა ეკატერინე გორგოძემ გერმანიის ქალაქ ბრაუნშვაიგში მიმდინარე საერთაშორისო ტურნირის (საპრიზო ფონდი 25 ათასი დოლარი) პირველ წრე დასძლია და მერვედფინალში გააღწია.

გორგოძემ კვალიფიკაციის ერთ-ერთი გამარჯვებული ლისა მატვიენკო 6:4, 2:6, 7:5 დაამარცხა, შემდეგ რაუნდში კი მე-6 ნომრად განთესილ ანა ვრლიჩს (ხორვატია) და მარტინა გარეგაროს (იტალია) შორის უმჯობესს ეთამაშება.

შეჯიბრს გამოეთიშა სოფო ქვაცაბაია, რომელმაც კვალიფიკაცია წარმატებით დასძლია, ძირითად ბადეში კი მე-7 რეიტინგის მქონე ხორვატ ტენა ლუკასთან 0:6, 2:6 წააგო.

წყვილებში გორგოძე და ქვაცაბაია მეოთხედფინალში არიან გასულნი, სადაც გერმანელებს – კატარინა გერლახს და კატარინა ჰობგარსკის გაეჯიბრებიან.