სპორტისა და ახალგაზრდობის საქმეთა მინისტრი ტარიელ ხეჩიკაშვილი მოადგილეებთან ერთად ტანვარჯიშის განვითარების სპორტული ცენტრის – განახლებული „ვითიბი არენას" გახსნას დაესწრო.

განახლებული დარბაზის გახსნაზე "ვი თი ბანკის" გენერალური დირექტორი არჩილ კონცელიძე, თბილისის მერიის მოადგილეები, საკრებულოს და ოლიმპიური კომიტეტის წარმომადგენლები, ტანვარჯიშის სახეობათა ფედერაციის პეზიდენტი კონსტანტინე ლაშხი, ვეტერანი და მოქმედი სპორტსმენები, ჟურნალისტები და გულშემატკივრები იმყოფებოდნენ.

2015 წლის 13 ივნისის ტრაგედიის შედეგად დაზიანებული თბილისის მუნიციპალიტეტის ტანვარჯიშის განვითარების სპორტული ცენტრს სრული რეაბილიტაცია ჩაუტარდა.

ცენტრის აღსადგენად ვითიბი ბანკმა ერთი მილიონ ოთხასი ათასი ლარი გამოყო. აღნიშნული თანხით დაფინანსდა შენობის სარემონტო სამუშაოები და თანამედროვე საერთაშორისო სტანდარტების სპორტული ინვენტარის შეძენა. ვითიბი ბანკი 2014 წლიდან არის საქართველოს ტანვარჯიშის ფედერაციის გენერალური სპონსორი. განახლებულ ტანვარჯიშის განვითარების სპორტული ცენტრს „ვითიბი არენა" ეწოდა.

სპორტული ცენტრში განთავსებულია მხატვრული და სპორტული ტანვარჯიშის დარბაზები. ცენტრი ყოველდღიურად ათასამდე ბენეფიციარს ემსახურება, აქედან უფასო მომსახურებით 57 სოციალურად დაუცველი მოზარდი სარგებლობს.

აღსანიშნავია, რომ ტანვარჯიშის განახლებული არენის გახსნაზე ტარიელ ხეჩიკაშვილმა ქართული ტანვარჯიშის განვითარებაში შეტანილი წვლილისათვის 85 წლის საიუბილეო თარიღთან დაკავშირებით საპატიო სიგელი გადასცა ტიტულოვან ქართველ ტანმოვარჯიშეს – გალინა შარაბიძეს.

სპორტისა და ახალგაზრდობის საქმეთა სამინისტროს პრესსამსახური