იტალიის სერია A-ში დაბრუნებული “კალიარი” ახალი სეზონისთვის გაძლიერებას შეუდგა. როგორც გუნდის ვებგვერდი იტყობინება, ამიერიდან სარდინიული კლუბის ღირსებას პორტუგალიის ნაკრების 34 წლის მცველი ბრუნო ალვეში დაიცავს. ვეტერანი ფეხბურთელი კუნძულელებს თავისუფალი აგენტის სტატუსით შეუერთდა და იტალიაში მომდევნო ორი სეზონის განმავლობაში დარჩება. ამასთან, კონტრაქტში დევს პუნქტი, რომლის თანახმადაც, სურვილის შემთხვევაში ხელშეკრულება კიდევ ერთი წლით ავტომატურად გახანგრძლივდება.
ბრუნო ალვეში ამჟამად პორტუგალიის ნაკრებთან ერთად ევროპის ჩემპიონატზე სათამაშოდ ემზადება. გასული სეზონი მან სტამბულის “ფენერბაჰჩეში” გაატარა, ხოლო მანამდე “ზენიტის”, “პორტუს”, “ფეირენსეს”, “გიმარაეშისა” და ათენის “აეკის” რიგებში ირჯებოდა.
