საქართველოს ჩემპიონატის მეორეადგილოსანმა “სამტრედიამ” თბილისში ვარჯიში დაიწყო და ახალწვეულებიც ჰყავს: გიორგი გამყრელიძე “გურიადან”, ბაჩანა არაბული “დინამოდან”, გიული მანჯგალაძე “სიონიდან” და თორნიკე გორგიაშვილი “ცხინვალიდან”.

გამყრელიძემ გასული სეზონი ჩაატარა “გურიაში” (15 მატჩი, 2 გოლი), მანამდე კი სლოვაკეთის “ზემპლინ მიხალოვცეში” გამოდიოდა – გუნდში, სადაც აკაკი ხუბუტიამ ითამაშა გასულ ერთ წელიწადში. გამყრელიძე ფლანგელი შემტევია, მეტწილად მარჯვნიდან თამაშობს.

მანჯგალაძე ცენტრალური ნახევარმცველი გახლავთ, ცენტრში თამაშობს გორგიაშვილიც, არაბული კი, გეცოდინებათ, თავდამსხმელია.

7 ივნისს სამტრედიელები, სავარაუდოდ, სლოვენიაში წავლენ შეკრებაზე. 20 ივნისს კი ნიონში კენჭისყრაა და გია ცეცაძის გუნდის მეტოქეც გაირკვევა ევროპის ლიგის საკვალიფიკაციო ეტაპზე.