მაისის სუპერტურნირის მე-13 დღეს ორივე ქართველმა სუმოისტმა მარცხი განიცადა და ეს, განსაკუთრებით საგანგაშო გაგამარუს შიკონათი ცნობილი თეიმურაზ ჯუღელისთვისაა, რომელსაც უარყოფით ბალანსამდე (მაკე-კოში) 1 წაგებაღა აშორებს.

აღმოსავლეთის მე-15 მაეგაშირას წოდების მქონე გაგამარუ აღმოსავლეთის მე-10 მაეგაშირა სადანოუმის გაეჯიბრა და 6 მოგების წილ მე-7 მარცხი (უვატედაშინაგეთი) შეემთხვა.

იოლი გამოსათვლელია, რომ წოდებაში დასაწინაურებლად, ქართველ გოლიათს დარჩენილი ორივე ბრძოლის მოგება მართებს, წინააღმდეგ შემთხვევაში კი, დიდი ალბათობით, რანგით მე-2 ძურიოს დივიზიონში დაქვეითდება.

ტოკიოს “რიოგოკუ კოკუგიკანში” მიმდინარე ნაცუ ბაშოს ბოლისწინა დღეს გაგამარუს პირისპირ დასავლეთის მე-8 მაეგაშირა მიტაკეუმი დადგება, რომელიც საკმაოდ კარგ ფორმაში იმყოფება და უკვე 9 გამარჯვება აქვს.

სწორედ მისდარი ბალანსი (9 მოგება, 4 მარცხი) აქვს ლევან გორგაძეს იგივე ტოჩინოშინს, რომელიც მაისის ტურნირზე გატეხილი ნეკნით ასპარეზობს, თუმცა, დადებითი ბალანსი (კაჩი-კოში) ვადაზე ადრე გაინაღდა.

ტოჩინოშინი, რომელიც დასავლეთის მე-4 მაეგაშირას წოდებით ირჯება, ამჯერად დასავლეთის მე-10 მაეგაშირა ტოკუშორიუსთან იორიტაოშით დამარცხდა, შემდეგ ორთაბრძოლას კი აღმოსავლეთის მე-13 მაეგაშირა დაიშომარუსთან ჩაატარებს.

ტოკიოს სუპერტურნირის მოგების უმთავრეს კანდიდატად იოკოძუნა ჰაკუჰო იქცა, რომელმაც ლიდერთა ჯახში ოძეკი კისენოსატო შიტატენაგეთი დაამარცხა და ახლა, თავ ზედიზედ 13 გამარჯვებით იწონებს.