ვაჟთა შორის საქართველოს პირველმა ჩოგანმა ნიკოლოზ ბასილაშვილმა წარმატებული სტარტი აიღო გერმანიის ქალაქ ჰეილბრონში დაწყებულ ჩელენჯერზე, რომლის საპრიზო ფონდიც 64 ათასი ევროა.

ბასილაშვილმა პირველ წრეში მე-4 ნომრად განთესილ ესპანელ დანიელ მუნოზ დე ლა ნავას, რომელიც რეიტინგში მასზე წინ იმყოფება (101-ე 125-ეს წინააღმდეგ), მოულოდნელად იოლად სძლია – 6:4, 6:1.

ამ გამარჯვების წყალობით, ნიკოლოზმა 8 სარეიტინგო ქულა შეიმატა, მერვედფინალში კი მსოფლიოს 195-ე ჩოგან ბლაზ როლას (სლოვენია) ეთამაშება, რომელმაც გერმანელი პეტერ ტორებკო 3:6, 6:2, 6:3 დაამარცხა.

ცნობისთვის, NECKARCUP-ს გამარჯვებული 100 სარეიტინგო ქულას და საპრიზო 9 200 ევროს მიიღებს.