მადა ჭამაში მოდისო და “ლესტერ სიტის” იტალიელ თავკაც კლაუდიო რანიერის ასე ემართება. როგორც მხცოვანმა სპეციალისტმა მშობლიურ “გაძეტა დელო სპორტთან” საუბრისას განაცხადა, სურს, “ლესტერმა” ევროპის ყველაზე პრესტიჟული საკლუბო ტურნირზე “ნოტინგემ ფორესტის” მიღწევა გაიმეოროს.
“ფეხბურთის ისტორიაში ყველაზე დიდ სენსაციად რჩება “ნოტინგემის” შედეგი, როცა ქვედა ლიგიდან გადმოსვლის შემდეგ ზედიზედ ორჯერ ჩემპიონთა თასი მოიგო. იმედია, მომავალ წელს, მათ სიმაღლეს ჩვენც მივაღწევთ.
ამბობენ, რომ იმ გუნდს, რომელიც ჩვენს ჯგუფში მოხვდება, გაუმართლებს, მაგრამ ჩვენ ევროპაშიც ისეთი შემართებით ვაპირებთ თამაშს, როგორც ეს წელს პრემიერლიგაში გავაკეთეთ. ბიჭებს ყოველთვის ვეუბნები, რომ გადამწყვეტი არაა ვინ მოიგებს, მთავარია მოედანზე მაქსიმუმი დავდოთ. ისინი ამას აკეთებენ და ჩემპიონთა ლიგაზეც ასე იქნება”, - თქვა რანიერიმ.
აღსანიშნავია, რომ “ლესტერი” მიუხედავად ევროპაში თამაშის გამოცდილების არქონისა, წილისყრისას პირველ კალათში იქნება, როგორც ინგლისის ჩემპიონი.
