ბელგიის ეროვნული ნაკრების და "ტოტენჰემის" ნახევარმცველი მუსა დემბელე სადისციპლინო კომიტეტმა 6-მატჩიანი დისკვალიფიკაციით დასაჯა. ინფორმაცია ფეხბურთის ფედერაციის ოფიციალურმა ვებგვერდმა გაავრცელა.
პრემიერლიგის 36-ე ტურში დემბელეს "ჩელსის" თავდამსხმელ დიეგო კოშტასთან ინციდენტი მოუვიდა და სადისციპლინო კომიტეტმა ბელგიელის საქციელი უხეშად მიიჩნია. შესაბამისად, დემბელე მიმდინარე სეზონთან ერთად, მომდევნო სეზონის სტარტსაც გამოტოვებს.
მიმდინარე სეზონში დემბელემ 35 მატჩი ჩაატარა, გაიტანა 4 გოლი და 1 საგოლე გადაცემა შეასრულა. მუსა ბელგიის ნაკრების წევრია და დიდი ალბათობით, აღნიშნული ფაქტის შემდეგ, ევროპის ჩემპიონატისთვის მზადებას შეუდგება.
