16 წლის ქართველი კალათბურთელის გოგა ბითაძის (სიმაღლე 210 სმ.) დიდი დახმარებით, სერბულმა “მეგა ლეკსმა” ქვეყნის კადეტთა პირველობის ოქროს მედლები მოიპოვა.

“მეგა ლეკსმა” ნახევარფინალში “პარტიზანს” შანსი არ დაუტოვა და სახელოვანი მეტოქე 87:57 გაანადგურა. გოგამ მოედანზე 23 წუთი დაჰყო და 13 ქულა, 8 მოხსნა, 6 დაფარება და 1 პასი მიითვალა. ბითაძემ 8-დან 6 ორქულიანი და 4-დან 1 საჯარიმო ჩააგდო, სამქულიანი ააცილა, 4 პერსონალური ფოლი მიიღო, მის წინააღმდეგ კი 3-ჯერ დაჯარიმდნენ.

ფინალში “მეგა ლეკსი” უმთავრეს ფავორიტ “ცრვენა ზვეზდას” შეხვდა და ისევ დამაჯერებლად – 77:59 მოიგო. ქართველი კალათბურთელი ამჯერადაც გამორჩეული იყო და 6 ქულა, 13 მოხსნა და 5 პასი მიითვალა.