საქართველოს ეროვნული ნაკრების და "ემპოლის" თავდამსხმელი ლევან მჭედლიძე იტალიის ფეხბურთის ფედერაციის სადისციპლინო კომიტეტმა სამმატჩიანი დისკვალიფიკაციით დასაჯა. აღნიშნულ ინფორმაციას იტალიური კლუბის ოფიციალური ვებგვერდი ავრცელებს.

25 აპრილს, "კარპისა" და "ემპოლის" მატჩის 25-ე წუთზე მჭედლიძემ მეტოქე ფეხბურთელს იდაყვი მოარტყა, რისთვისაც მსაჯმა მას წითელი ბარათი უჩვენა, ხოლო სადისციპლინო კომიტეტმა საქციელი განზრახ უხეშობაში ჩაუთვალა და მკაცრად დასაჯა.

შედეგად, ლევანისთვის სეზონი დასრულებულია, რადგან სერია A-ში სამი ტურია დარჩენილი, ხოლო თასზე "ემპოლი" აღარ ასპარეზობს. მიმდინარე სეზონში მჭედლიძემ 14 მატჩი ჩაატარა და თავი ვერაფრით გამოიჩინა. ქართველმა 3 ყვითელი და 1 წითელი ბარათი მიიღო, მოედანზე კი საშუალოდ 24 წუთს ატარებდა. 18 შეხვედრა ლევანმა ტრავმის გამო გამოტოვა.