ნორვეგიულ ფიორდეში მიმდინარე ძალოსანთა ევროპის ჩემპიონატზე მორიგი მედლები 85 კილოგრამამდე წონით კატეგორიაში გათამაშდა და ფიცარნაგზე ახალგაზრდებში მსოფლიოს და ევროპის პირველობების პრიზიორი რევაზ დავითაძე ვიხილეთ.

17 წლის ქართველი სპორტსმენი B ჯგუფში გამოდიოდა და უკეთესი შედეგი ატაცში აჩვენა, სადაც 150-კოლოგრამიანი შტანგა დასძლია. აი, აკვრაში კი, რევაზი მხოლოდ საწყისი წონას (175 კგ.) გაუმკლავდა, 182-კილოგრამიან შტანგასთან კი 2 მისვლა გაუცუდდა.

საბოლოოდ, დავითაძეს 325 კგ. მოუგროვდა და მან მე-15 ადგილი დაიკავა, თუმცა, უნდა ითქვას, რომ ქართველმა ძალოსანმა შარშან იუნიორთა ევროპის ჩემპიონატზე ნაჩვენები შედეგი ერთბაშად 21 კგ-ით (304, 136+168) გააუმჯობესა.

ამ წონაში ჩემპიონობისთვის დრამატული ბრძოლა წარიმართა და საბოლოოდ, უკრაინელმა ოლეკსანდრ პიელეშენკომ (372 კგ.) რუმინელ გაბრიელ სინკრაიანს (371 კგ.) 1 კილოგრამით აჯობა. რუმინელს ერგო ბრინჯაოც. გეორგი ჩერენის მაჩვენებელი 358 კგ. გახლდათ.

დღეს, ფიცარნაგზე ორ ქართველ ძალოსანს ვიხილავთ. 94 კილოგრამამდე წონით კატეგორიაში A ჯგუფში იასპარეზებს 2012 წლის ევროპის ჩემპიონი რაულ ცირეკიძე, ალუდა მანაგაძე კი ძალებს 105 კილოგრამამდე წონით კატეგორიაში, B ჯგუფში მოსინჯავს.