ნორვეგიულ ფიორდეში მიმდინარე ძალოსანთა ევროპის ჩემპიონატზე მედლები 77 კილოგრამამდე წონით კატეგორიაში გათამაშდა. საქართველოს ღირსებას ირაკლი გაბრიჭიძე იცავდა, რომელმაც მე-11 ადგილის დაკავება შესძლო.

ქართველი ძალოსანი B ჯგუფში ასპარეზობდა და საერთო ჯამში, ექვსიდან 4 ცდა გამოიყენა. ირაკლიმ ატაცში 149 კგ. დასძლია, ხოლო აკვრაში – 175 კგ. ჯამში, მან 324 კგ. მოაგროვა და B ჯგუფში მე-3 მაჩვენებელი ჰქონდა, თანაც, ბულგარელ მეტოქეს მხოლოდ პირადი წონის გამო ჩამორჩა.

საინტერესოა, რომ B ჯგუფის გამარჯვებულმა რუმინელმა დუმიტრუ ჩაპტარიმ თავი 348 კგ-ს მოუყარა და საერთო ჩათვლაში მე-3 პოზიცია დაიკავა, რაც ხშირად ნამდვილად არ ხდება.

აი, კვარცხლბეკის უმაღლესი საფეხურები კი სომეხმა ძალოსნებმა დაიკავეს. ოქროს მედალი ანდრანიკ კარაპეტიანმა (367 კგ.) მოიპოვა, ხოლო ვერცხლი – ტიგრან მარტიროსიანმა (352 კგ.).

დღეს, ნორვეგიულ ფიცარნაგზე 85 კილოგრამამდე წონითი კატეგორიის წარმომადგენლები გავლენ და საქმეში რევაზ დავითაძესაც ვიხილავთ, რომელიც ასევე B ჯგუფში იასპარეზებს.