ზაზა ფაჩულია განაგრძობს სასტარტო ხუთეულში თამაშს, „დალასი“ კი - გამარჯვებებს. ტეხასელებმა ზედიზედ მეოთხე მოგება მინესოტაში გაიფორმეს, სადაც „ტიმბერვულვზს“ 88:78 მოუგეს და დასავლეთ კონფერენციის საპლეიოფო ბრძოლაში წინ წაიწიეს.

უფრო სწორად კი, დალასელები მეტოქეებს არ ჩამორჩნენ, რადგან დღის მატჩები კონკურენტმა „იუტამაც“ მოიგო და „ჰიუსტონმაც“. რაც შეეხება მინესოტელებთან მოგებულ მატჩს, ტეხასელებს შორმა სროლებმა უშველა. „დალასმა“ 40-დან 14 სამქულიანი ჩააგდო, საიდანაც 6 - ვესლი მეთიუზის ანგარიშზე მოდის.

ფაჩულიას სეზონის ერთ-ერთი მწირექულიანი მატჩი ჰქონდა. მან მოედანზე 23 წუთი დაჰყო და 3 ცდიდან 1 ორქულიანი ჩააგდო. ქართველმა ცენტრმა მთლიანობაში 2 ქულა, 9 მოხსნა, 1 პასი და 1 ჩაჭრა მიითვალა. მისმა შემცვლელმა სალაჰ მეჯრიმ 19 წუთში ქულა ვერ მოიპოვა და შეხვედრა 5 მოხსნით დაასრულა.

39 მოგებითა და 38 მარცხით „დალასი“ და „იუტა“ დასავლეთ კონფერენციაში 7-8 ადგილებს იყოფენ. მე-9-ზე მყოფ ჰიუსტონელებს კი პირიქით - 38 მოგება და 39 მარცხი აქვთ. მომდევნო მატჩი ფაჩულიას გუნდს სწორედ „ჰიუსტონთან“ ელის. პრინციპული შეხვედრა 7 აპრილს დალასში გაიმართება.

www.gbf.ge