100 კილოგრამ წონით კატეგორიაში მოჭიდავე ძიუდოისტმა ბექა ღვინიაშვილმა სამსუნის გრან პრიზე ოქროს მედალი მოიპოვა და 300 სარეიტინგო გულა გამოიმუშავა, რითაც რიო დე ჟანეიროს ოლიმპიური თამაშების საგზური ფაქტობრივად გაინაღდა.
ფინალის გზაზე ღვინიაშვილმა ოთხი მეტოქე იპონ-იპონ ჩამოიშორა. თურქ ენეშ თათარს 58 წამში სძლია, პირველ ნომრად განთესილ აზერბაიჯანელ ელმარ გასიმოვს - 43 წამში, ბრიტანელ ბენჯამინ ფლეჩერს - წუთსა და 19 წამში, ხოლო არაბეთის გაერთიანებული საემიროების ნაკრების წევრ ივან რემარენკოს - წუთსა და 11 წამში. გადამწყვეტ ბრძოლაში კი ბრაზილიელ რაფაელ ბუზაკარინისთან იუკოს უპირატესობა იკმარა.
