საქართველოს მორაგბეთა ნაკრები პირველად შევიდა “მსოფლიო რაგბის” რეიტინგის მოწინავე 12-ეულში. “ბორჯღალოსნებმა” შარშან, მსოფლიო თასზე კი დააფინიშეს ზედა 12-ეულში და 2019 წლის თასზე, იაპონიაში ასპარეზობაც დაიბევეს, მაგრამ ერთია მსოფლიოს განთესვა და სულ სხვა – რეიტინგი, რომელიც ყოველ ორშაბათს ახლდება ვიქენდის შედეგების მიხედვით.

საქართველომ შაბათს, სოჭში, 24:7 ძლია რუსეთი. რაკი თამაში სტუმრად მოვიგეთ და თანაც 15 ქულაზე მეტით, მაგის გამო მეტადაც ვიხეირეთ – 76 ერთეულით და გადავუსწარით ტონგას და კიდევ უფრო მოვიტოვეთ 6 ერის მონაწილე იტალია, რომელსაც წინა სანაკრებო კვირას გადავუსწარით.

რეიტინგის პრინციპით, ამდენივეთი იზარალა დამარცხებულმა რუსეთმა და მე-20 ადგილამდე დაეშვა. ერთი საფეხურით აღზევდა ინგლისი, ვინაც ვადამდე გახდა “ექვსი ერის” ჩემპიონი, “რაგბი ევროპაზე” ჩვენი ბოლო მეტოქე – რუმინეთი კი მე-16 პოზიციაზე დარჩა.

“მსოფლიო რაგბის” რეიტინგი (14/03/2016)

1. ახალი ზელანდია 96.10

2. ავსტრალია 89.33

3. სამხრეთ აფრიკა 87.66

4. უელსი 83.10

5 (6). ინგლისი 83.06

6 (5). არგენტინა 82.59

7 (8). ირლანდია 79.70

8 (7). საფრანგეთი 79.29

9. შოტლანდია 78.95

10. იაპონია 77.05

11. ფიჯი 76.96

12 (13). საქართველო 72.21

13 (12). ტონგა 71.60

14. იტალია 70.78

15. სამოა 70.36

16.რუმინეთი 67.93

“ბორჯღალოსანთა” დასაბამიდან რეიტინგში პირველად ავღზევდით ისტორიულ მე-12 ადგილზე, თანაც სეზონის ყველაზე მნიშვნელოვანი მატჩის წინ. ამით არაფერი დასრულებულა. 19 მარტს ”დინამო არენაზე” შინ ჩვენს ყველაზე პრინციპულ მეტოქეს, “მუხებად” წოდებულ რუმინეთის ნაკრებს ვუმასპინძლებთ. “რაგბი ევროპის” წლევანდელი სეზონის დამაგვირგვინებელი მატჩის ბილეთები უკვე იყიდება.

სეზონის ფინალურ მატჩზე არენის გავსება და მორიგჯერ რუმინელი “მუხების” დამარცხება ქართული რაგბის აღმასვლისთვის ძალზე მნიშვნელოვანია. აქედან გამომდინარე, 19 მარტს ერთად გავავსოთ “დინამო არენა” და სავსე ტრიბუნებით დავხვდეთ რუმინელებს.

www.rugby.ge