ბერძნულ-რომაული სტილით ჭიდაობაში ევროპის ჩემპიონატზე რვა წონითი კატეგორიიდან ოთხში ჩემპიონ-პრიზიორები უკვე გამოვლინდნენ. ევროპოდიუმზე ერთი ქართველიც ავიდა - 66 კილოგრამში მოჭიდავე შმაგი ბოლქვაძემ მესამე საპრიზო ადგილი დაიკავა. ირაკლი შავაძემ (59 კგ), რევაზ ნადარეიშვილმა (98 კგ) და იაკობ ქაჯაიამ (130 კგ) კი პოდიუმზე ასვლის შანსი დილის პროგრამაშივე დაკარგეს.

ბოლქვაძემ ძირითად ბადეში გამოსვლა შვედეთის ნაკრების წევრ ფრუნზე არუთინიანის ძლევით (8:4) დაიწყო. შემდეგ ხორვატი დანიელ იანეჩიჩი ჩამოიცილა (8:0). მეოთხედფინალში კი, მომავალ ჩემპიონთან - რუსეთის ნაკრების წევრ ისლამ-ბეკა ალბიევთან დამარცხდა (4:8) და რეპეშაჟში გადაერთო, სადაც საფრანგეთის ნაკრების წევრი ჰრაჩია მალხასიასნი ჩამოიშორა (9:2) და „ბრინჯაოს ფინალში“ ლატვიელ ნიკიტა ვენცკაიტისს აჯობა (6:4).

ირაკლი შავაძემ ძირითად ბადეში ორი ბრძოლა ჩაატარა. ბერძენი აპოსტოლოს მანუილიდისის ადვილად ძლევის (10:1) შემდეგ, მეოთხედფინალში სომეხ რომან ამოიანთან წააგო (6:13) და დამამშვიდებელ ეტაპზე გადაერთო, მაგრამ ბრინჯაოსკენ მიმავალ გზაზე ხორვატი ივან ლიზატოვიჩი გადაეღობა (9:14).

რევაზ ნადარეიშვილმა ევროპირველობა ლიტველი ვილიუს ლაურინაიტისის ძლევით (9:0) გახსნა, მაგრამ მეოთხედფინალში, თურქ ჩენკ ილდემთან ვეღარას გახდა (0:7) და ჯერ ოქრო-ვერცხლისთვის ბრძოლას გამოეთიშა, შემდეგ კი ბრინჯაოს შანსიც დაკარგა, მას შემდეგ, რაც ილდემმა ნახევარფინალში წაიფორხილა.

ნადარეიშვილის მსგავსად, იაკობ ქაჯაიამაც ორი შეხვედრა ჩაატარა რიგის ხალიჩაზე. ხორვატ სტეპან ლავრიჩთან მოპოვებული გამარჯვების (5:0) შემდეგ, შეჯიბრებას მეოთხედფინალიდან გამოეთიშა, შვედ იოჰან მაგნუს ეურენთან ფრედ დასრულებული (1:1) ბრძოლის შემდეგ.

ევროპირველობის დასკვნით დღეს - 13 მარტს საპრიზო სამეულები ბერძნულ-რომაულში, დარჩენილ ოთხ წონით კატეგორიაში: 71, 75, 80 და 85 კილოგრამებში გათამაშდება. საქართველოს სახელით კი ევროკონკურენციაში მინდია წულუკიძე (71 კგ), ზურაბ დათუნაშვილი (75 კგ), ნიკოლოზ კელასოვი (80 კგ) და რობერტ ქობლიაშვილი (85 კგ) ჩაებმებიან. წინასწარი ეტაპის შეხვედრები თბილისის დროით 12 საათიდან დაიწყება.