სასტუმრო “ჰოლიდეი ინ-“ში საქართველოს ფუტსალის ლიგის პრეზენტაცია გაიმართა. 14 მარტს ლიგა დაიწყება, 8 გუნდი ერთ წრედ შეხვდება ერთმანეთს, მერე კი ნახევარფინალები (ორრაუნდიან ფლეი ოფში) და ფინალი გაიმართება. ფინალი 10 ივნისს ჩატარდება.
ფუტსალის ლიგის ორგანიზებას საქართველოს ფეხბურთიოს ფედერაციასთან ერთად, სპორტული სააგენტო SBM განახორციელებს.
პრეზენტაციისას სფფ-ის ვიცე-პრეზიდენტმა ნიკა ჯღარკავამ და SBM-ის დირექტორმა ზაალ ჩიტალაძემ ისაუბრეს:
ჯღარკავა: “ჩვენთვის მნიშვნელოვანია, რომ ფუტსალის ჩემპიონატი მაღალ დონეზე გაიმართოს. ეს ერთ-ერთი პოპულარული და საინტერესო სახეობაა საქართველოში. ფედერაცია ყველანაირად ხელს შეუწყობს მის განვითარებას და ვეცდებით, რომ ფუტსალი როგორც გულშემატკივრებისთვის, ასევე ბიზნესმენებისთვისაც საინტერესო გახდეს. მოხარული ვარ, რომ SBM-მა ასეთი კარგი საქმე ითავა”.
ჩიტალაძე: “დიდი მადლობა ფეხბურთის ფედერაციას გამოცხადებული ნდობისთვის. ჩვენ წარმოვადგინეთ კონცეფცია და ხედვა, თუ როგორ უნდა განვავითაროთ ფუტსალი საქართველოში. წლევანდელი სეზონი გარდამავალი გახდება განვითარების გზაზე, ფუტსალი კერძო ბიზნესისთვის საინტერესო იქნება. ეს ერთწლიანი პროექტი არაა”.
შემდეგ კი ჩემპიონატის წილისყრა გაიმართა და კალენდარიც შედგა. მონაწილე 8 გუნდს რაც შეეხება, ესენი არიან: “დინამო” (ბათუმი), თსუ, “უფლისციხე” (გორის რაიონი), სტუ-თელასი (მოქმედი ჩემპიონი), “სპარტაკი”, “თბილისი”, “აფხაზეთი” და იბსუ.
შეხვედრები გაიმართება ახალ სპორტის სასახლეში, იქვე ჩატარდება ნახევარფინალები და ფინალიც. გაისად კი ლიგაში 16 გუნდის მონაწილეობა იგეგმება.
მიმდინარე სეზონში საპრიზო ფონდიც იქნება, თითოეულ ქულაზე დაირიცხება თანხა და დამატებით თანხას მიიღებენ ჩემპიონი და მეორეადგილოსანიც.
პირველ ტურში, 14 მარტს ეს გუნდები შეხვდებიან ერთმანეთს: დინამო (ბათუმი)-თსუ, უფლისციხე-სტუ თელასი, სპარტაკი-თბილისი, აფხაზეთი-იბსუ. თამაშები ერთ წრედ რომ დასრულდება, ნახევარფინალში პირველადგილოსანი მეოთხეადგილოსანს შეხვდება (23 და 30 მაისს), ხოლო მეორეადგილოსანი მესამეადგილოსანს. ფინალზე კი ვთქვით, 10 ივნისს ჩატარდება.