ბრაზილიელი ლეგენდარული ფეხბურთელი პელე აუქციონზე 2000 საგანს გაიტანს, მათ შორის მსოფლიოს ჩემპიონატებზე მოგებულ ოქროს მედლებს და ძველი მსოფლიოს თასის ასლსაც. ინფორმაციას როიტერი ავრცელებს.

ფეხბურთის “მეფედ” წოდებული პელე ქველმოქმედებისთვის ფულის მისაღებად გაყიდის ბურთს, რომლითაც მე-1000 გოლი გაიტანა, აგრეთვე მაისურებს და ჯილდოებს, რაც კი “სანტოსსა” და “ნიუ იორკ კოსმოსში” თამაშის დროს მოუპოვებია.

აუქციონი ლონდონში სამი დღის განმავლობაში გაიმართება. გამოფენა პირველ ივნისს დაიწყება და პელეს ნივთების შეძენა ფეხბურთის გულშემატკივრებს 7, 8 და 9 ივნისს შეეძლებათ. ბრაზილიელის გადაწყვეტილებით, შემოსული თანხის ნაწილი ბრაზილიის ქალაქ კურიტიბაში განთავსებულ საბავშვო საავადმყოფოს გადაეცემა.