25 წლის მეკარე გიორგი მაკარიძემ მენისკის ოპერაცია გაიკეთა და ერთი თვე ვერ ითამაშებს. როგორც იცით, მაკარიძე პორტუგალიის პირველი ლიგის კლუბ “ფეირენსეში” ერთ-ერთი საუკეთესოა და როგორც თავად მისგან შევიტყვეთ, პორტუგალიის უმაღლესი ლიგის სამი გუნდისგანაც აქვს შემოთავაზება – “მორეირენსესგან”, “ბოავიშტასგან” და “ნასიონალისგან”.

“ვარჯიშის დროს ფეხი გადამიბრუნდა და მენისკის ოპერაცია დამჭირდა” – უთხრა worldsport.ge-ს გიორგიმ.

და რაც შეეხება შემოთავაზებებს, მაკარიძემ არ გამორიცხა, რომ “ფეირენსეში” დარჩეს, თუმცა ეს იმ შემთხვევაში, თუ კლუბი უმაღლესში გადავა:

“თუ “ფეირენსე” გადავა უმაღლესში, მაშინ აქ მირჩევნია დარჩენა. თუ არა, ალბათ “მორეირენსეში” წავალ. ჯერ ველოდები და ვნახოთ. მაისში “ფეირენსესთან” მიმთავრდება ხელშეკრულება და გადავწყვეტ. ყველა ვარიანტში უმაღლესში ვითამაშებ”.

ცნობისთვის, “ფეირენსე” პირველ ლიგაში ლიდერთა ჯგუფშია და უმაღლესში გადასვლის შანსი აქვს. “მორეირენსეს” რაც შეეხება, უმაღლესში ბოლოდან მეოთხე საფეხურზეა.

შეგახსენებთ, ეროვნული ნაკრების ბოლო მატჩებში მაკარიძეს იძახებდნენ, თუმცა არ ათამაშებდნენ. ეს ბოლოს, თორემ გიორგი 17 წლისა იყო, ეროვნულ გუნდში დებიუტი რომ ჰქონდა – კლაუს ტოპმიოლერის მწვრთნელობისას.