მანუჩარ მარკოიშვილის “დარუშაფაკას” თურქეთის თასის მოგებამდე ორიოდ წამი დააკლდა. სწორედ ამ დროს, “ფენერბაჰჩეს” სერბმა ლეგიონერმა ბოგდან ბოგდანოვიჩმა სამქულიანი გაისროლა და თავის გუნდს 67:65 მოაგებინა.

არადა, “დარუშაფაკას” გამარჯვების შემთხვევაში, დიდი შანსი იყო, ფინალის საუკეთესო მოთამაშედ ქართველი მცველი დაესახელებინათ, რომელიც მოედანზე ერთ-ერთი საუკეთესო იყო.

მარკოიშვილმა 24:47 წუთი ითამაშა და 16 ქულა, 4 მოხსნა და 3 ჩაჭრა მიითვალა, რაც “დარუშაფაკას” რიგებში საუკეთესო მაჩვენებელი იყო. მანუჩარმა 4-დან 2 ორქულიანი და 7-დან 4 სამქულიანი ჩააგდო, ბურთი ერთხელ დაკარგა და 2 პერსონალური ფოლი მიიღო.

15 ქულა ჩააგდო ქართველის ამერიკელმა თანაგუნდელმა სკოტი ვილბეკინმა, “ფენერბაჰჩეს” მხრიდან კი, ბოგდანოვიჩის (21 ქულა) გარდა, ჩეხი ცენტრი იან ვესელი გამოირჩა, რომელსაც ორმაგ დუბლამდე ცოტა დააკლდა – 14 ქულა, 9 მოხსნა.

მარკოიშვილისთვის ეს მარცხი ძალიან დასანანი იქნებოდა, თუმცა, ჩვენი ნაკრების ქომაგისთვის მთავარი მანუს დამაჯერებელი თამაში უნდა იყოს. შეგახსენებთ, რომ მან თასის მეოთხედფინალში ასევე 16 ქულა ჩააგდო, ნახევარფინალში კი – 10 და ჯამში, სათასო ბატალიების ერთ-ერთი მთავარი ფიგურა იყო.