ბოლნისის “სიონის” გენერალურმა დირექტორმა ლადო ბურდულმა კმაყოფილება გამოთქვა ფეხბურთის განვითარების პროგრამის დღევანდელი პრეზენტაციის შემდეგ. ბურდულმა თქვა, კონკრეტულად ”სიონისთვისაც” კარგი პროგრამაა და დასაწუნი არც სხვა კლუბებს უნდა ჰქონდეთო.

- ჩემი აზრით, დიდი საქმე გაკეთდა. დიდი ნაბიჯი გადაიდგა ქართული ფეხბურთის განვითარების გზაზე. სწორი მენეჯმენტის შემთხვევაში, ყველა კლუბს შეეძლება წინსვლა. მაგალითად, ჩვენ შეიძლება 3 მილიონამდეც გავზარდოთ ბიუჯეტი. თუნდაც ის ფაქტი, რომ პირველი ლიგის გუნდებისთვის ამხელა დაფინანსებებია, უკვე მშვენიერია. პირველლიგელებს დიდი სტიმული ექნებათ, რომ უმაღლესში გადავიდნენ, თუმცა არც იმით დამთავრდება მათი ცხოვრება, თუ ვერ გადავლენ: იმდენი თანხა ექნებათ, რომ მშვიდად გააგრძელონ მუშაობა.

- “სიონი” საბიუჯეტო კლუბია და კერძო ინვესტორის მოძებნა არ გაუჭირდება?

- “სიონს” მილიონნახევარზე მეტი ბიუჯეტი არც არასდროს ჰქონია. ჩვენ სწორი კალაპოტით მიგვყავდა საქმე და ასევ გავაგრძელებთ.

- ჩემპიონატში მეოთხე ადგილზე ხართ, ხოლო თასზე – ნახევარფინალში...

- კარგი შანსი გვაქვს და მიზანიც სწორედ ევროთასებზე გასვლაა. ვეცდებით ამ მიზანს მივაღწიოთ. ჩვეულებრივ, ისევ ბოლნისში ვითამაშებთ, სტადიონი კეთილმოვაწყეთ, მინდორი კარგ მდგომარეობაშია.