ვაკო ყაზაიშვილმა ჰოლანდიის ჩემპიონატში დუბლი მიითვალა და ერედივიზიონის ამ სეზონში თავისი გოლების მონაგარი 9-მდე გაზარდა. “ვიტესი”-“ჰერენვენის” შეხვედრაში (3:0) მან პირველი ტაიმის ბოლოს გაიტანა, ხოლო მეორე ნახევარში კიდევ ერთი მიამატა. ჯერ ახლო მანძილიდან, მარცხნიდან გაკეთებული პასის შემდეგ ცაციით დაბალი დარტყმით, მერე კი – პენალტით (VIDEO). ვაკო ბოლო წუთებზე შეცვალეს. ყაზაიშვილი ამ სეზონში “ვიტესის” მთავარმეგოლეა.

გურამ კაშიამ შეუცვლელად ითამაშა და საკმაოდ კარგადაც. უსუალო მოვალეობების გარდა, შეტევებისთვისაც იცლიდა.

გიორგი აბურჯანიამ კვლავ მშვენივრად ითამაშა “ხიმნასტიკში”. ტარაგონელებმა 1:0 მოუგეს “ელჩეს” და ერთადერთ გოლში ქართველმა ლომის წილი დაიდო: სამ მეტოქეს გასცდა, შემდეგ მოხდენილი პასით პირისპირ გაიყვანა ნარანხო და მანაც გაიტანა (იხილეთ საგოლე შეტევა). გარღვევაც კარგი იყო პასიც – გიორგი მშვენივრად შეეწყო “ხიმნასტიკს” და იმედია, ასეც გააგრძელებს.

აბურჯანიამ შეუცვლელად ითამაშა. “ხიმნასტიკი” ამ მოგებით მეორე ადგილზე გადავიდა და პრიმერაში გადასვლის კარგი შანსიც აქვს.

საფრანგეთში “რეიმსმა” შინ 0:1 წააგო “ბასტიასთან” და ბოლოდან მეოთხე ადგილზეა, ანუ საშიშ ზონასთან ახლოს – ლიგიდან სამი გუნდი ვარდება. ჯაბა კანკავას დისკვალიფიკაციის გამო არ უთამაშია.

ასევე უთამაშებელი დარჩა ლევან ყენია. ჩეხეთში “სლავიამ” “ბრნოს” 2:0 მოუგო და მეოთხე პოზიციაზეა. ყენიას მიკროტრავმა აქვს და წინა ამხანაგური მატჩიც გამოტოვა.