საქართველოს 16 და 18-წლამდე გოგონათა საკალათბურთო ნაკრებები მომავალ ზაფხულს ევროპის ჩემპიონატის C დივიზიონში იასპარეზებენ, 18-წლამდელთა ტურნირს კი სულაც თბილისი უმასპინძლებს.

ქართული კალათბურთის ისტორიაში პირველად ხდება, რომ ფიბა-ევროპის ღონისძიების მასპინძელი საქართველო იქნება.

ევროპის ჩემპიონატის C დივიზიონის მატჩები თბილისში 8-13 ივლისს გაიმართება და მასში მონაწილეობა მიიღებენ:

A ჯგუფი: სომხეთი, ანდორა, უელსი.

B ჯგუფი: საქართველო, მალტა, გიბრალტარი, კოსოვო.

რაც შეეხება საქართველოს 16-წლამდელთა ნაკრებს, ევროპის ჩემპიონატის C დივიზიონის მატჩებს 18-23 ივლისს ანდორის დედაქალაქი უმასპინძლებს. ჯგუფები შემდეგნაირად დალაგდა:

A ჯგუფი: უელსი, კოსოვო, მალტა.

B ჯგუფი: ანდორა, გიბრალტარი, საქართველო.

საქართველოს კალათბურთის ფედერაციის ქალთა კალათბურთის განყოფილებამ უკვე დაიწყო ნაკრებებისთვის კანდიდატთა შერჩევა. აღმოსავლეთ საქართველოს ქალაქებიდან დინამოს საწვრთნელ ბაზაზე კანდიდატთა შერჩევის 2 ეტაპი ჩატარდა. საკალათბურთო კემპს ფედერაციაში ქალთა კალათბურთის განყოფილების ხელმძღვანელი, ცნობილი ვეტერანი კალათბურთელი მედეა მხეიძე უძღვებოდა. პირველი ეტაპი 15-17 იანვარს ჩატარდა, ხოლო მეორე – 23-24 იანვარს.

საკალათბურთო კემპში მონაწილეობა 120-მდე გოგონამ მიიღო. მონაწილეები შემდეგი ქალაქებიდან იყვნენ: ახმეტა, თელავი, ხაშური, გორი, რუსთავი და თბილისი. 2 ეტაპის შედეგად 80-მდე გოგონა შეირჩა, რომლებსაც დასავლეთის წარმომადგენლებიც დაემატებიან და 5-7 თებერვალს გაიმართება კანდიდატთა მესამე შესარჩევი კემპი. ამის შემდეგ თითოეულ ასაკში საბოლოოდ აირჩევა 20-22 კანდიდატი, რომელთაგან დაკომპლექტდება საქართველოს 16 და 18-წლამდელთა ნაკრებები.

www.gbf.ge