66 კილოგრამ წონით კატეგორიაში მოჭიდავე ქართველმა ძიუდოისტმა ვაჟა მარგველაშვილმა ჰავანაში გუშინ დაწყებულ პრესტიჟულ საერთაშორისო ტურნირზე – გრან პრიზე ბრინჯაოს მედალი და 120 სარეიტინგო ქულა მოიპოვა. საქართველოს ნაკრების სამწვრთნელო შტაბმა ერთი კვირის წინანდელი "აფრიკის ღია ტურნირის” მსგავსად, კუბური განაცხადიც მხოლოდ ორი პრობლემატური წონის: 66 და 100 კილოგრამების სპორტსმენებით დააკომპლექტა, შემადგენლობაში სამი ძიუდოისტი შეიყვანა და მათგან საქმეში ჯერ მხოლოდ ერთი ჩაება.

მარგველაშვილმა ჰავანას გრან პრი კუბელი ჟილბერტო სოლარის წუთნახევარში ძლევით გახსნა. მეორე წრეში გაცილებით ძლიერ მეტოქეს დაეჭიდა - ევროპის 2010 წლის ჩემპიონს, ესპანეთის ნაკრების წევრ სუგოი ურიარტეს უილეთო შეხვედრაში ერთი გაფრთხილებით (2:3) აჯობა. ალჟირელ ჰოუდ ზურდანი 2 წუთში დასცა ბეჭებზე და ნახევარფინალში გავიდა. Iქ კი ევროპის შარშანდელ ჩემპიონთან ფრანგ ლუის კორვალთან ვეღარას გახდა და რეპეშაჟის ფინალში გადაერთო, სადაც კიდევ ერთი ძლიერი მოწინააღმდეგე – გერმანელი შებასტიან სეიდლი დაამარცხა შიდოებით (1:3).

66 კილოგრამში პოდიუმის უმაღლეს საფეხურზე რუსეთის ნაკრების წევრი კამალ ხან-მაგომედოვი ავიდა, ლუის კორვალის ძლევით. მესამე ადგილი კი მარგველაშვილთან ერთად იტალიელმა ელიო ვერდემ დაიკავა.

გუშინვე, მამაკაცებს შორის ჩემპიონ-პრიზიორები უმსუბუქეს წონაში – 60 კილოგრამშიც გათამაშდა. კონკურენციაში საქართველოს ნაკრების წევრი ბეთქილ შუკვანიც ჩაერთო, რომელიც ბეკირ ოზლუსა და თურქეთის სახელით გამოდის. საკმაოდ ეფექტურადაც იჭიდავა და საბოლოოდ ვერცხლის მედალი და 180 ქულა გამოიმუშავა. ჩემპიონი ბრაზილიელი ერიკ ტაკაბატაკე გახდა. ბრინჯაოს მედლებს კი სომეხი ჰოვანეს დავთიანი და აზერბაიჯანელი ორხან საფაროვი დაეუფლნენ.

დღეს ვაჟებში საპრიზო სამეულები 73 და 81 კილოგრამებში შეივსება. ხვალ კი ტატამზე 90, 100 და +100 კილოგრამების მოჭიდავეები გავლენ და კიმონოს ალექსანდრე მსხალაძე და გურამ თუშიშვილიც (ორივე 100 კგ) მოირგებენ.

ძიუდო

გრან პრი

ჰავანა

22 იანვარი

60 კგ

1 ერიკ ტაკაბატაკე (ბრაზილია)

2 ბეკირ ოზლუ (თურქეთი)

3 ჰოვანეს დავთიანი (სომხეთი)

3 ორხან საფაროვი (აზერბაიჯანი)

66 კგ

1 კამალ ხან-მაგომედოვი (რუსეთი)

2 ლუის კორვალი (საფრანგეთი)

3 ვაჟა მარგველაშვილი (საქართველო)

3 ელიო ვერდე (იტალია)