იტალიის ჩემპიონმა ტურინის “იუვენტუსმა” იტალიის ახალგაზრდული ნაკრებისა და “ჯენოას” 18 წლის ნახევარმცველი როლანდო მანდრაგორა გაიფორმა. ამის შესახებ “ბებერი ქალბატონის” ვებგვერდი იუწყება. “იუვეს” ნიჭიერი ფეხბურთელის ტრანსფერი 6 მილიონი ევრო დაუჯდა და იგი “იუვენტუს სთედიუმზე” 2021 წლის ზაფხულამდე ითამაშებს.

მანდრაგორა, რომელსაც ასაკის მიუხედავად 21-წლამდე ნაკრებში უკვე 6 თამაში ჩაუტარებია, ამჟამად სერია B-ს ბინადარ “პესკარაში” ირჯება, სადაც “ჯენოას” იჯარით ჰყავდა გასხვისებული. კონტრაქტში ჩადებული პუნქტის თანახმად, როლანდო მიმდინარე სეზონს სწორედ ადრიატიკულ კლუბში ჩაამთავრებს და “იუვეს” მიმდინარე წლის 1 ივლისიდან შეუერთდება.

“პესკარას” რიგებში წლეულს მანდრაგორამ 16 მატჩი ჩაატარა, თუმცა გოლი არ გაუტანია.