ქართველი ჩოგბურთელი ეკატერინე გორგოძე, რომელმაც გასულ კვირას ანტალიაში 10-ათასიანი ტურნირი მოიგო, თურქეთში რჩება და ხვალიდან ანალოგიურ შეჯიბრში ჩაებმება.
გორგოძე ისევ მე-2 ნომრადაა განთესილი და პირველ წრეში გერმანელ იანა მორდერგერს გაეჯიბრება. ანტალიაშია სოფო ქვაცაბაიაც, რომელსაც მე-3 რეიტინგი აქვს და ძალებს შევიცარიელ ჩიარა გრიმთან მოსინჯავს.
წყვილთა ტურნირში მხოლოდ ქვაცაბაია ითამაშებს. ის რუსეთის სახელით მოასპარეზე ნათელა წიკლაურთან გახლავთ შეამხანაგებული და თურქულ-რუსულ დუეტს (ორალი-შეპიტა) გაეჯიბრება.
