ქართველი ჩოგბურთელი ეკატერინე გორგოძე თურქეთის ქალაქ ანტალიაში მიმდინარე 10-ათასიან ტურნირზე ერთბაშად 2 ტიტულისთვის ბრძოლას განაგრძობს.

ერთეულთა ტურნირზე მე-2 ნომრად განთესილმა გორგოძემ მეოთხედფინალში სლოვენიელი პია ჩუკი 6:3, 2:6, 6:2 დაამარცხა და ნახევარფინალში ძალებს მე-7 რეიტინგის მქონე ავსტრიელ ჯულია გრაბერთან მოსინჯავს. ფინალის მე-2 საგზურისთვის ერთმანეთს ბულგარელი ვიკტორია ტომოვა (მე-8) და ანა ბონდარი (მე-5) დაუპირისპირდებიან.

წყვილთა ტურნირში გორგოძე სოფო ქვაცაბაიასთან გახლავთ შეამხანაგებული და უკვე ფინალშია გასული. ქართველმა ჩოგბურთელებმა უნგრელებს – ბონდარსა და სტოლმარს (მე-3 განთესვა) 0:6, 6:4, 10:8 სძლიეს და გადამწყვეტ მატჩში უნგრელ აგნეშ ბუკტას და ავსტრიელ გრაბერს (მე-4) გაეჯიბრებიან.