ევროპის ჩემპიონთა თასის მფლობელმა, მამუკა გორგოძის, ლევან ჩილაჩავასა და კოტე მიქაუტაძის “ტულონმა” პირველი ტურის გადადებულ მატჩში ინგლისური “ბათი” უმძიმეს ბრძოლაში 12:9 დაამარცხა და ჯგუფში მეორე ადგილამდე აღზევდა.
ულელოო შეხვედრა 12 772-მა მაყურებელმა იხილა. ორივე გუნდს თითო-თითო რეალური სალელოვე შანსი ჰქონდა, მაგრამ ფრანგთა გარღვევა მარცხენა ფლანგზე მცველებმა ბოლო მომენტში შეაჩერეს, ხოლო 72-ე წუთზე კრის კოკიმ ბურთი ჩაჭრა, მაგრამ ის წინ დაუვარდა, თორემ “ბათი” საფრანგეთიდან გამარჯვებული თუ არა, 2 ქულით მაინც დაბრუნდებოდა.
ანგარიში ჯარიმით სწორედ სტუმრებმა გახსნეს, რის შემდეგაც ჯორჯ ფორდის ორი არეკნით კიდევ ორჯერ დაწინაურდნენ, მაგრამ მასპინძლებმა ყველა ჯერზე შეძლეს საპასუხო ჯარიმის გატანა. 75-ე წუთზე “ბათი” საკუთარი 22-ის ხაზთან ფლობდა ბურთს, როდესაც რაქში დაჯარიმდა და ფრედერიკ მიშალაკმა “ტულონს” უმნიშვნელოვანესი გამარჯვება მოუტანა.
ქართველ ლეგიონერთაგან განაცხადში არ იყო გორგოძე, რომელსაც მწვრთნელებმა დასვენების საშუალება მისცეს. მისი პოზიციისთვის უჩვეულოდ სრულად ითამაშა ბურჯმა ჩილაჩავამ. მან უზარმაზარი შავი სამუშაო გაწია და მაგრად იბრძოლა, ბურთით 4-ჯერ შეუტია და ჯამში 7 მეტრი გაიარა, მეტოქეები კი, 7-ჯერ შებოჭა. მასზე ერთით მეტი ბოჭვა მხოლოდ ორმა მორაგბემ შეასრულა, ერთს კი, ქართველივით 7 ბოჭვა დაუგროვდა. ჩილაჩავა ორჯერ დაჯარიმდა. მიქაუტაძემ 52 წუთი ითამაშა, 8-ჯერ შეუტია და 9 მეტრი გაიარა, მეტოქე 4-ჯერ შებოჭა და ორი დერეფანი მოიგო. მან თამაში უჯარიმოდ ჩაამთავრა.
17 იანვარს “ტულონი” კიდევ ერთ ინგლისურ კლუბს, “უოსპს” მასპინძლობს და გამარჯვების შემთხვევაში ჯგუფის ლიდერი გახდება.
პირველი ჯგუფის გადადებულ მატჩში ფრანგული “ოიონაქსი” ირლანდიურ “ოლსტერს” პირველი ტაიმის შემდეგ 23:0 ამარცხებდა, მაგრამ სტუმრებმა ხასიათი გამოავლინეს და ისე, რომ ვერავინ წარმოიდგენდა, მეორე ტაიმში 24 უპასუხო ქულა გაიტანეს და საბოლოოდ 24:23 იმარჯვეს.
ჩემპიონთა თასი 2015/2016
I ჯგუფი
ოიონაქსი (საფრანგეთი) - ოლსტერი (ირლანდია) 23:24
| 1. | სარასენსი (ინგლისი) | 4 | 4 | 0 | 0 | 159:39 | 19 | |
| 2. | ოლსტერი (ირლანდია) | 4 | 3 | 0 | 1 | 96:73 | 13 | |
| 3. | ტულუზი (საფრანგეთი) | 4 | 1 | 0 | 3 | 54:113 | 5 | |
| 4. | ოიონაქსი (საფრანგეთი) | 4 | 0 | 0 | 4 | 64:148 | 2 |
V ტური. 16 იანვარი
სარასენსი - ოლსტერი; ოიონაქსი - ტულუზი
V ჯგუფი
ტულონი (საფრანგეთი) - ბათი (ინგლისი) 12:9 VIDEO
| 1. | უოსპსი (ინგლისი) | 4 | 3 | 0 | 1 | 124:47 | 14 | |
| 2. | ტულონი (საფრანგეთი) | 4 | 3 | 0 | 1 | 62:66 | 12 | |
| 3. | ბათი (ინგლისი) | 4 | 2 | 0 | 2 | 63:87 | 9 | |
| 4. | ლენსტერი (ირლანდია) | 4 | 0 | 0 | 4 | 47:96 | 2 |
V ტური. 16-17 იანვარი
ლენსტერი - ბათი; ტულონი - უოსპსი
