“ვერდერის” ქართველმა ლეგიონერმა გიორგი პაპუნაშვილმა, რომელიც ბრემენელთა პირველ გუნდში სულ ახლახანს დააწინაურეს, პირველი გოლის გატანა მოახერხა.

თურქულ ბელეკში შეკრებაზე მყოფმა გერმანულმა კლუბმა “ერცგებირგე აუესთან” მატჩი 1:3 წააგო, ანგარიში კი სწორედ გიორგიმ გახსნა: მე-18 წუთი მიდიოდა, როდესაც ბურთი საჯარიმოს მისადგომებთან მოიგდო და მეკარისგან მარჯვენა მაღალ კუთხეში დიდებულად დაარტყა (იხილეთ გოლი).

პაპუნაშვილმა შეუცვლელად ითამაშა და მე-2 ტაიმში ყვითელი ბარათიც მიიღო.

აღსანიშნავია, რომ დღესვე “ვერდერმა” კიდევ ერთი საკონტროლო მატჩი ჩაატარა და შეცვლილი შემადგენლობით, თურქულ “სივასპორს” დაუზავდა – 0:0.

ბრემენელები ბელეკში რჩებიან და 15 იანვარს ისევ ორი შემადგენლობით ითამაშებენ. დილით “ვერდერის” მეტოქე ბაქოს “ინტერი” იქნება, შუადღით კი – ვენის “აუსტრია”.