საფეხბურთო კლუბმა "საბურთალომ", რომელიც უმაღლეს ლიგაში პირველ სეზონს ატარებს, ეროვნული ჩემპიონატის მეორე წრისთვის მზადება 4 იანვრიდან დაიწყო.
თბილისური კლუბის ოფიციალური ვებგვერდის ცნობით, გიორგი ჭიაბრიშვილის შეგირდები ორშაბათს "ბენდელას" სახელობის სტადიონზე შეიკრიბნენ - ჯერ ფიტნეს დარბაზს დაუთმეს გარკვეული დრო, შემდეგ კი მინდორზე 40 წუთის განმავლობაში მსუბუქად ირბინეს.
ფეხბურთელები სამედიცინო შემოწმებას 8 იანვარს გაივლიან, რის შემდეგაც რამდენიმე სპარინგ-შეხვედრას გამართავენ. მზადების დასკვნითი ეტაპი კი გუნდს თურქეთში აქვს დაგეგმილი.
