გადაწყდა, რომ გიორგი აბურჯანია ესპანეთის სეგუნდა დივიზიონის კლუბში, ტარაგონას “ხიმნასტიკში” ითამაშებს. 21 წლის ქართველი დღეს, ან ხვალ შეუერთდება კატალონიურ კლუბს, რომელიც სეგუნდაში მეხუთე ადგილზეა და პრიმერა დივიზიონში გადასასვლელად იბრძვის.

აბურჯანია ბოლო წელიწადნახევრის განმავლობაში კვიპროსული “ანორთოსისის” ერთ-ერთი წამყვანი ფეხბურთელი გახლდათ, თითქმის მუდმივად ძირითად შემადგენლობაში თამაშობდა. ასე რომ, “ანორთოსისში” ერთი ქართველი რჩება: ირაკლი მაისურაძე.

რაც შეეხება “ხიმნასტიკს”, ამ გუნდში ქართველთათვის კარგად ნაცნობი ფეხბურთელი გამოდის: თბილისის “დინამოს” ყოფილი ფორვარდი ჩისკო, რომელსაც ამ სეზონში ერთი გოლი აქვს გატანილი. ჩისკო უკვე ასაკშია (35 წლის) და ძველებურად ვეღარ თამაშობს.

შეგახსენებთ, აბურჯანიას უთამაშია საქართველოს 17 და 19-წლამდელთა ნაკრებებში, ამჟამად კი 21-წლამდელებშია.