ფიფას პრეზიდენტს იოზეფ ბლატერს და უეფას თავკაცს მიშელ პლატინის ფეხბურთში საქმიანობა 8 წლით აეკრძალათ. როგორც ფიფას პრესსამსახური იტყობინება, ასეთი გადაწყვეტილება მიიღო მსოფლიო ფეხბურთის მმართველი ორგანიზაციის ეთიკის კომიტეტმა, რომელიც ფიფას ხელმძღვანელის მხრიდან პლატინის ანგარიშზე გადარიცხული თანხის კანონიერების საკითხს იკვლევდა.

ეთიკის კომიტეტის განცხადებაში აღნიშნულია, რომ მხარეთა მტკიცებულებები, რომლის თანახმად, 2 მილიონი შვეიცარიული ფრანკის ოდენობის თანხა, რამდენიმე წლის წინ პლატინის მიერ შესრულებული საკონსულტაციო სამუშაოების ანაზღაურება იყო, არადამაჯერებლად ცნეს. გარდა ფეხბურთიდან ჩამოშორებისა, ბლატერი 50 ათასი შვეიცარიული ფრანკით დაჯარიმდა, პლატინის კი 80 ათასის გადახდა დაეკისრა.

ფიფას ეთიკის კომიტეტის ამ გადაწყვეტილების შედეგად, მიშელ პლატინი მონაწილეობას ვერ მიიღებს 2016 წლის 26 თებერვალს დაგეგმილ ფიფას საპრეზიდენტო არჩევნებში.