იტალიელი სპეციალისტი კარლო ანჩელოტი 2016 წლის 1 ივლისიდან მიუნხენის “ბაიერნს” ჩაუდგება სათავეში. გერმანული გრანდის ოფიციალური ვებგვერდის ინფორმაციით, 56 წლის მწვრთნელი “რეკორდმაისტერებს” 2019 წლის ივლისამდე უთავკაცებს.

კლუბის აღმსასრულებელმა დირეკტორმა კარლ-ჰაინც რუმენიგემ პეპ გვარდიოლას გუნდში გაწეული ღვაწლისთვის მადლობა გადაუხადა. ანჩელოტმა განაცხადა, რომ მისთვის დიდი პატივია “ბაიერნის” მწვრთნელობა.

გვარდიოლა მიუნხენურ გუნდში 2013 წელს მივიდა. მას შემდეგ “ბაიერნმა” ორჯერ მოიგო ბუნდესლიგა, ხოლო თითო-თითოჯერ – გერმანიის თასი, უეფას სუპერთასი და ფიფა საკლუბო მსოფლიო თასი.

ანჩელოტი კარიერის განმავლობაში “პარმას”, “იუვენტუსს”, “მილანს”, “ჩელსის”, პსჟ-ს და მადრიდის “რეალს” წვრთნიდა.