მანუჩარ მარკოიშვილის “დარუშაფაკა” ევროლიგის მორიგ ტურში ქართველი კალათბურთელის ყოფილ კლუბ ცსკა-ს ესტუმრა და უშანსოდ დამარცხდა – 66:94 (მე-3 მეოთხედში – 7:29). ამასთან, წარმატებული თამაში მანუსაც არ ჰქონია.

საქართველოს ნაკრების ერთ-ერთი ლიდერი სასტარტო ხუთეულში იყო, თუმცა, პერსონალური ფოლები მალევე აკრიფა და საბოლოოდ, მოედანზე მხოლოდ 14:08 წუთი გაატარა.

მარკოიშვილმა მეტოქის ფარს საშუალო დისტანციიდან ერთადერთხელ შეუტია და ისიც არაზუსტად. მანუჩარის აქტივში თითო მოხსნა, ჩაჭრა და პასი იყო, პასივში კი 1 დაკარგვა და 4 ჯარიმა.

თურქულის კლუბის რიგებში 10-ქულიან ზღვარს რეჯი რედინგმა (12), სკოტი ვილბეკინმა (11) და ლუკ ჰერენგოდიმ (10) უწიეს, ცსკა-ს კი ნანდო დე კოლომ (14), ვიტალი ფრიძონმა (13), კორი ჰიგინსმა (12), ჯოელ ფრილანდმა (11) და დრიუ ნიკოლსმა (10) ულიდერეს.

“დარუშაფაკა” 4 მოგებით და 5 მარცხით D ჯგუფში მე-4 ადგილზეა და თუკი დასკვნითი ტურის შემდეგ, ამ პოზიციას შეინარჩუნებს, ტოპ-16-ის საგზურს მოიპოვებს.

მარკოიშვილის კლუბს მიზნის მიღწევის კარგი შანსი აქვს, რადგანაც ბოლო ტურში უშუალო კონკურენტ “მაკაბის” შინ იღებს და თუკი 12 ან მეტი ქულით არ წააგებს, შემდეგი ეტაპის საგზური ჯიბეში ექნება.