დანიის ფეხბურთის ფედერაციამ ეროვნული ნაკრების მთავარი მწვრთნელის პოსტზე ნორვეგიელი სპეციალისტი შეარჩია. დანიის საფეხბურთო კავშირის ოფიციალური ვებგვერდის ცნობით, ევრო 2016-ის შესარჩევი პლეი ოფის შემდეგ გადამდგარ მორტენ ოლსენს, “მალმიოს” ყოფილი თავკაცი ოგე ჰარეიდე შეცვლის. 62 წლის ნორვეგიელი მუშაობას 2016 წლის 1 მარტიდან შეუდგება და მისი კონტრაქტი ძალაში 2018 წლამდე იქნება.

ჰარეიდეს ფეხბურთელობისას “მიოლდეში”, “მანჩესტერ სიტისა” და “ნორვიჩში” უთამაშია, 1976-1986 წლებში 50 მატჩში დაიცვა ნორვეგიის ეროვნული ნაკრების ღირსება. მწვრთნელობაც მშობლიურ “მიოლდეში” დაიწყო, ამ გუნდის გარდა, სხვადასხვა წლებში წვრთნიდა “ჰელსინგბორგს”, “ბრონდბიუს”, “რუსენბორგს”, “ვიკინგს” და ნორვეგიის ეროვნულ ნაკრებს.