პარასკევიდან კვირის ჩათვლით, ჩინეთის ქალაქი ქინგდაო ძიუდოში გრან პრის უმასპინძლებს. პრესტიჟულ საერთაშორისო ტურნირს ინტერესს რიო დე ჟანეიროს ოლიმპიური თამაშების სალიცენზიო ქულების გათამაშება შემატებს. ჩემპიონები პირად რეიტინგს 300-300 ქულით გაიუმჯობესებენ. ვერცხლის პრიზიორები 180-180 ქულას გამოიმუშავებენ, ხოლო ბრინჯაოსნები – 120-120-ს. უქულოდ არც წინასწარ ეტაპებზე დამარცხებულები დარჩებიან.

საქართველოს ნაკრებს სალიცენზიო ნორმატივის შესრულება მხოლოდ ორ წონით კატეგორიაში: 66 და 100 კილოგრამებში უჭირს და ეროვნული გუნდის სამწვრთნელო შტაბმაც ჩინურ განაცხადში სწორედ ამ ორ წონაში მოჭიდავე ძიუდოისტები შეიყვანა. 66-ში ქინგდაოს ტატამზე ვაჟა მარგველაშვილი და თორნიკე თათარაშვილი გავლენ, ხოლო 100-ში: ალექსანდრე მსხალაძე და გურამ თუშიშვილი.

გრან პრიზე საქართველოს ქალთა ნაკრებსაც ეყოლება ორი მონაწილე. კიმონოს მარიამ ჯანაშვილი (52 კგ) და ესტერ სტამი (70 კგ) მოირგებენ.

სამდღიანი ტურნირის პირველ დღეს საპრიზო სამეულები მამაკაცთა შორის 60 და 66 კილოგრამ წონით კატეგორიებში შეივსება, ხოლო ქალებში – 48, 52 და 57 კილოგრამებში.

ვაჟა მარგველაშვილი სატურნირო ბადის პირველ ჯგუფში მოხვდა, გრან პრიზე პირველ ნომრად განთესილ მონღოლ ტუმურხულეგ დავაადორჟთან ერთად. მათი გზები მეოთხედფინალში იკვეთება. იქამდე კი ქართველმა მსუბუქწონოსანმა ორი ეტაპი უნდა დაძლიოს. შეჯიბრებას მარგველაშვილი საუდის არაბეთის ნაკრების წევრ სულეიმან ჰამადთან დაჭიდებით გახსნის. გამარჯვების შემთხვევაში კი სავარაუდოდ პორტუგალიელ ანდრე სუარეშს შეხვდება.

თორნიკე თათარაშვილი ბადის საპირისპირო მხარეს მოხვდა და პირველ მეტოქედ ჩინელი დაგა ქინგი ერგო. ამ წყვილიდან გასული ებრაელ ტალ ფლიკერსა და გერმანელ რენე შნეიდერს შორის მოგებულს დაეჭიდება. მეოთხედფინალში გასვლის შემთხვევაში კი თათარაშვილი აზერბაიჯანელ ნიჯატ შიხალიზადეს, ყაზახ სერგეი ლიმსა და მონღოლ ბატგერელ ბაცეცეგს შორის უძლიერესს დაუპირისპირდება.

პარასკევსვე, პოდიუმები ქალთა სამ წონაშიც შეივსება: 48, 52 და 57 კილოგრამებში. მარიამ ჯანაშვილი უფროსებს შორის სალიცენზიო ქულების აკრეფას ტაივანელ ჩინ-ინგ ჩენთან შეხვედრით შეუდგება. ამ წყვილში მოგებულს კი მერვედფინალში უძლიერესი მოწინააღმდეგე ელოდება, მსოფლიოს 2010 წლის ჩემპიონის - იაპონელი იუკა ნიშიდას სახით.

შაბათს სამეულები კაცებში 73 და 81 კილოგრამებში შეივსება, ქალებში – 63 და 70 კილოგრამებში. კვირას კი მედლების ბოლო ხუთი კომპლექტი გათამაშდება. კაცებში 90, 100 და +100, ხოლო ქალებში – 78 და +78 კილოგრამებში.

გურამ თუშიშვილი მეორე წრით და ჩინელი ჟუნ ჟანგით დაიწყებს და გამარჯვების შემთხვევაში მერვედფინალის საგზურს მოიპოვებს, სადაც ტურნირზე პირველ ნომრად განთესილ ევროპის 2-გზის პრიზიორს - აზერბაიჯანელ ელმარ გასიმოვსა და იაპონელ რიუტარო გოტოს შორის მოგებულს დაეჭიდება.

პირველ წრეში ალექსანდრე მსხალაძეც დაისვენებს, ისევე, როგორც მისი მეტოქე – დანიელი ფრედერიკ იორგენსენი. შემდეგ კი გაცილებით მძიმე ბრძოლა ელის უკრაინელ არტემ ბლოშენკოსა და იაპონელ კაიან ტაკაგის შორის უძლიერესთან.