“მანჩესტერ იუნაიტედის” მეკარე ვიქტორ ვალდესი, შესაძლოა კატალონიაში დაბრუნდეს და კონტრაქტი “ესპანიოლთან” გააფორმოს.

Goal-ის ცნობით, “ბარსელონას” ყოფილი ფეხბურთელი, დიდი ალბათობით “მანჩესტერს” თავისუფალი აგენტის სტატუსით დატოვებს და “ესპანიოლსაც” მისით გაძლიერება კაპიკიც არ დაუჯდება.

ინგლისური კლუბის მთავარმა მწვრთნელმა ლუი ვან გაალმა ესპანელი სარეზერვო გუნდში გაისტუმრა და ყოველგვარი მიკიბვ-მოკიბვის გარეშე განაცხადა, რომ კლუბში მის ადგილს ვერ ხედავს. ვალდესს ინგლისელებთან კონტრაქტი მიმდინარე სეზონის ბოლომდე აკავშირებს. გამოცემის ინფორმაციით, მეკარე “ესპანიოლთან” მოლაპარაკების აქტიურ ფაზაში იმყოფება და არაა გამორიცხული, მასთან შეთანხმება საშობაოდ გააფორმოს.

კატალონიური “ბარსელონას” ყოფილი მეკარე “მანჩესტერში” 2014 წელს გადავიდა და ინგლისის პრემიერლიგის გასული სეზონის მხოლოდ ორ მატჩში მიიღო მონაწილეობა. ამასთან, მისი ოჯახი კატალონიაში დარჩა, რამაც დამატებითი პრობლემები შექმნა. “ესპანიოლის” მთავარი მწვრთნელი სერხიო გონსალესი გეგმავს, რომ ვიქტორი გუნდის ძირითად მეკარედ აქციოს და ამრიგად, ამ ტრანსფერს აღსრულების ყველანაირი წინაპირობა აქვს.