ქართველი ოქსანა კალაშნიკოვას და რუსი მარგარიტა გასპარიანის წყვილმა საფრანგეთის ქალაქ ლიმოჟში დასრულებული საერთაშორისო ტურნირის (საპრიზო ფონდი 92 749 ევრო) ფინალი დათმო.

საინტერესოა, რომ ENGIE Open de Limoges-ში მხოლოდ 8 წყვილი ჩაება, ამდენად, პირველ ნომრად განთესილ კალაშნიკოვას და გასპარიანს სულ 3 მატჩის ჩატარება მოუწიათ.

მათ მეოთხედფინალში “უაილდ ქარდის” მქონე ფრანგებს – მატილდა იოჰანსონს და ალიზ ლიმს 6:4, 7:5 სძლიეს, ნახევარფინალში ჩეხები – ლენკა კუნჩიკოვა და კაროლინა სტუჩლა 6:3, 6:3 დაამარცხეს, ხოლო ფინალში მე-2 რეიტინგის მქონე ჩეხურ-ლუქსემბურგულ დუეტთან (ბარბორა კრეიჩიკოვა-მენდი მინელა) 6:1, 5:7, 6:10 დამარცხდნენ.

საინტერესოა, რომ ოქსანა და მარგარიტა მე-2 სეტში 5:2-ზე აწვდიდნენ, სუპერ ტაი-ბრეიკზე კი 4:0 დაწინაურდნენ, თუმცა, წაგება მაინც “მოახერხეს”. კალაშნიკოვამ და გასპარიანმა 95-95 სარეიტინგო ქულა გამოიმუშავეს და საპრიზო ფონდიდან 2 742 ევროც ერგოთ.

შეგახსენებთ, რომ წყვილთა რეიტინგში ქართველ ჩოგბურთელს 956 ქულით 78-ე ადგილი უკავია, გასული ტურნირის შედეგებით კი, მცირე წინსვლა ელის.

ისიც ვთქვათ, რომ ლიმოჟის ტურნირის ერთეულთა ბადის კვალიფიკაციაში კალაშნიკოვა მე-3 ნომრად განთესილ უკრაინელ კატერინა კოზლოვას გაეჯიბრა და 6:4, 0:6, 5:7 დამარცხდა. საინტერესოა, რომ ამ უკანასკნელმა შემდეგ კიდევ 3 მატჩი მოიგო და ტურნირს მეოთხედფინალში გამოეთიშა.